Hardloop vir ’n goeie doel
Neem aan die Comrades Marathon deel wat op 29 Mei vanaf Pietermaritzburg na Durban gehardloop word.
ATLETE kan kilometer-vir-kilometer geld vir Bybels insamel.
Trek jou tekkies aan en stel jou stophorlosie om vanjaar deel te word van die Bybelgenootskap van Suid-Afrika se Hardloop vir Bybels-projek. Belangstellendes kan vanjaar deel raak van dié projek deur deel te neem aan die Comrades Marathon wat op 29 Mei vanaf Pietermaritzburg na Durban gehardloop word.
Ander wedlope waaraan atlete kan deelneem om by te dra tot die werk van die Bybelgenootskap, sluit die Two Oceans-, Loskopdam-, Suikerbosrand- en Nedbank City-marathon in. Vriende, familie, gemeentelede of kollegas kan atlete borg vir elke kilometer wat hulle aflê en só word geld vir die Bybelgenootskap dan ingesamel. Borgvorms word slegs aan atlete beskikbaar gestel ná registrasievorms vir die wedloop deur die Bybelgenootskap ontvang is.
Die geld wat tydens dié wedlope ingesamel word sal gebruik word vir ’n verskeidenheid van die Bybelgenootskap se projekte wat onder meer daarop gerig is om Bybels aan arm mense beskikbaar te stel asook Bybelvertaling.
Die geld sal onder meer gebruik word vir die vertaling van die Engelse Bybel vir Dowes, die verspreiding van Bybels onder gevangenes, graad sewe leerlinge in agtergeblewe gebiede, en aan mense in Suid-Afrika se buurlande. Vir meer inligting, kontak Marina Stebbing by 011 970 4010 of stuur ’n e-pos na stebbing@biblesociety.co.za
Lees ook :
2016 Comrades Marathon entries open
